Հայաստանի Հանրապետական կուսակցություն

 «Գնա ընտրության, որ Նիկոլը գնա»՝ այդ քարոզարշավի մեջ ենք և կոչ ենք անելու գնալ ընտրության ու չքվեարկել Փաշինյանի թիմի օգտին. Շարմազանով

«Մեդիալաբի» հարցերին պատասխանում է ՀՀԿ Գերագույն մարմնի անդամ Էդուարդ Շարմազանովը 

– Պարո՛ն Շարմազանով, նախընտրական փուլում գտնվող Հայաստանում ընթացող ներքաղաքական զարգացումներն ինչպե՞ս եք գնահատում: Իշխանության ներկայացուցիչները Ռոբերտ Քոչարյանի, Գագիկ Ծառուկյանի ու Սամվել Կարապետյանի ղեկավարած քաղաքական ուժերին անվանում են «ռուսա-բելառուսական եռագլուխ նախագիծ», ըստ ձեզ, ինչո՞ւ:

– Վտանգը նրանցից են տեսնում: Մենք չենք առաջադրվելու ուղղակի, ու տեսնում են, որ ընդդիմադիր ուժերի հիմնական էլեկտորատը այդ ուժերի մեջ է, հետևաբար փորձում են վարկաբեկել, փորձում են ցեխ շպրտել, այլ բացատրություն չկա: Իբր թե ինքն անկախության պաշտպանն է, մյուսներն էլ այլ երկրների շահերն են պաշտպանում: 

Իրականում իր քաղաքականությունը այս 8 տարվա ընթացքում Հայաստանը տարել է ադրբեջանացման ու վիլայեթացման, հազար անգամ հարցազրույցներում ես ասել եմ այս մասին, ու իմ բոլոր գնահատականներն ուժի մեջ են մնում: Մտահոգված է, որ քարոզարշավի ընթացքում այդ երեք ուժն իրեն թույլ չտա 50 + 1 ստանալ, դրա համար էլ ինքը թիրախավորում է այդ ուժերին, քարոզչական հնարքի մի մաս է: 

Գիտեք՝ զավեշտը որն է, որ մարդկանց գործակալ լինելու մեջ մեղադրում է մի մարդ, որը մոսկովյան վերջին այցի ժամանակ՝ Պուտինի հետ հանդիպման ընթացքում, ապացուցեց, որ ինքը Հայաստանի ինքնիշխանությունը մատաղ է արել, ասում է՝ դու երկու անգամ հայտարարել ես, որ Ղարաբաղն Ադրբեջանի մաս է, դրա համար էլ ես ճանաչեցի: Այսինքն՝ եթե վաղը Պուտինը Երևանը ճանաչի Ադրբեջանի մաս, դու ճանաչելո՞ւ ես: Ինչպե՞ս կարելի է, որ քո պետության ղեկավարն այլ պետության ղեկավարին ասի՝ ես ճանաչեցի Արցախն Ադրբեջանի մաս, որովհետև դու երկու անգամ հայտարարել ես այդ մասին: 

– Կարծում եք, որ նման թիրախավորմամբ իշխանությանը կհաջողվի՞ այդ ուժերի ընտրազանգվածին հեռացնել նրանցից:

– Ես չեմ կարող գուշակություններ անել՝ կհաջողվի, թե չի հաջողվի, համենայնդեպս, ես կոչ եմ արել ու անում ժողովրդին ակտիվ գնալ ընտրության ու չընտրել Նիկոլ Փաշինյանին, որովհետև Նիկոլ Փաշինյանը դուրս է եկել Հայաստանի անկախության ու Անկախության հռչակագրի դեմ: Հունիսի 7-ին ով ընտրում է Նիկոլ Փաշինյանին, ուղիղ ընտրում է «Ենի Ադրբեջան» կուսակցության նարատիվները: Ես ուղիղ ասում եմ, որովհետև ինձ ո՛չ մանդատ է պետք, ո՛չ պաշտոն, ես չեմ առաջադրվել, ինձ իմ հայրենիքն է պետք, ես հայրենիքի համար եմ կռիվ տալիս: Նիկոլ Փաշինյանին ընտրելը հավասարազոր է Իլհամ Ալիևին ընտրելուն:

– Պարո՛ն Շարմազանով, որքանո՞վ է ընտրություններին ՀՀԿ-ի չմասնակցելու հանգամանքը արդյունավետ դարձնելու գործընթացները, որոնք կնպաստեն, որ ՔՊ-ն չստանա սահմանադրական մեծամասնություն:

– Համագումարում մենք մեր կարծիքն ասել ենք, համենայնդեպս, սոցիոլոգիական հարցումների համաձայն, ՀՀԿ-ին ընտրողները չեն պատրաստվում մեր չառաջադրվելու պարագայում ձայն տալ Նիկոլ Փաշինյանի թիմին, մենք էլ հորդորել ենք գնալ ընտրություններին ու Նիկոլ Փաշինյանի թիմին ձայն չտալ, խնդիրն այն է, որ չփոշիանան ձայները: ՀՀԿ-ն 5 չէ, 7 տոկոսից էլ ավելի ձայն կհավաքեր, դա խնդիր չէ, մի հատ ՀՀԿ-ի թիմին նայեք, պարզապես մենք ասել ենք, թե ինչո՛ւ չենք մասնակցում այս անգամ: Շատ էին ասում, թե նախկիններն են խանգարում, որ Նիկոլը գնա, մենք էլ հիմա չկանք, թող Նիկոլին հեռացնեն:

– Ստացվում է, համաձայն չե՞ք այն քննարկումներին, ըստ որոնց ՀՀԿ-ն հասկացել է, որ անցողիկ շեմը չի հավաքի, դրա համար էլ անիմաստ ռեսուրսներ չի ուզում ծախսել՝ ընտրություններին մասնակցելով:

– Իհարկե ոչ, բայց մենք ռեսուրս ծախսելու ենք ու շատ իմաստալից: «Գնա ընտրության, որ Նիկոլը գնա»՝ այդ քարոզարշավի մեջ ենք առաջին օրվանից և կոչ ենք անելու ակտիվ գնալ ընտրության ու չքվեարկել Նիկոլ Փաշինյանի թիմի օգտին, այլ՝ ընդդիմադիր ուժերից որևէ մեկի օգտին:

– Գործադիրի հերթական նիստին հաջորդած ճեպազրույցի ժամանակ Նիկոլ Փաշինյանն ասաց, որ Ռուսաստանի նախագահի հետ պայմանավորվել են հանդիպել հունիսի երկրորդ կեսին: Ո՞րն է նման հայտարարության մեսիջը:

– Դրանով ուզում է ասել, իբր Պուտինն էլ է զգում, որ ինքն է ընտրվելու, ու պայմանավորվել են արդեն ընտրություններից հետո հանդիպել: Ինքը փորձում է այս խայտառակ հանդիպումից հետո ցույց տալ, թե ինքը Պուտինի հետ շատ լավ հարաբերությունների մեջ է, ամեն բան լավ է: Նպատակը դա է՝ ցույց տալ, որ նույնիսկ Ռուսաստանում հասկացել են, որ ինքը վերընտրվելու է, ու արդեն երկարաժամկետ ծրագրեր են կազմում: Ամեն բան կախված է ժողովրդից, թող ո՛չ Պուտինի, ո՛չ Թրամփի, ո՛չ Մակրոնի գրպանը չգցեն ոչինչ: Ամեն մեկն ինքը պետք է որոշի, թե ում է տալու իր քվեն:

Ես Գարեգին Նժդեհի գաղափարախոսության ջատագովն եմ, նա ասել է. «Հայ ժողովուրդը երկու բան պետք է հասկանա, որ իր բոլոր դժբախտությունների պատճառը պետք է նախևառաջ իր մեջ փնտրի, երկրորդը՝ իրեն պետք եղած ուժը՝ հաղթանակներ կերտելու, խնդիրներ լուծելու, էլի պետք է փնտրի իր մեջ»: Եթե մենք չուզենանք մեր հարցերը լուծել, հարևանը չի ուզի: Արտաքին քաղաքականության մեջ սիրել կամ այլ կատեգորիա չկա, կա միայն պետական ու ազգային շահ, վերջ, ինչը պահանջում է քո պետության շահը, դա էլ պետք է անես: Մեր պետության շահը, ըստ իս, պահանջում է, որ Փաշինյան Նիկոլն իր թիմով պետք է գնա «վաստակաշատ» հանգստի:

Քրիստինե Աղաբեկյան

MediaLab.am